Is-Suċċess tal-Università tat-Tielet Età

Ħmistax ilu kelli l-okkażjoni li nattendi għat-tqassim taċ-ċertifikati għal dawk l-anzjani li jattendu l-Università tat-Tielet Età.  Kif tafu, u kif jafu d-diriġenti ta’ din l-istituzzjoni, għalija l-Università tat-Tielet Età hi esperjenza mill-aqwa u li rnexxiet ħafna u personalment tista’ tgħid li dejjem naħtaf kull opportunità li jkolli biex insemmiha u nippromwoviha. Bla dubju kienet mewġa friska għall-anzjani tagħna li xtaqu impenn u provokazzjoni mhux tas-soltu f’ħajjithom.

L-Università tat-Tielet Età laqgħet fi ħdanha mijiet ta’ anzjani tul is-snin li ilha mwaqqfa. L-għan ewlieni baqa’ li joffri fonti ta’ għerf għal dawk l-anzjani li xtaqu u jixtiequ jbillu subgħajhom f’dinja sabiħa u hekk vasta tat-tagħlim. 

Huwa sabiħ tinnota li l-Università tat-Tielet Età diġà faddlet wara daharha dsatax-il sena ta’ tagħlim kontinwu.

L-Università tat l-opportunità lil dawk li jridu jitgħallmu biex jiksbu l-għerf mingħajr ċertu rbit.  Mhux għax mhux sabiħ li jkollok iċ-ċertifikati, imma din l-esperjenza fetħet il-bibien għal kulħadd mingħajr ma talbet kwalifiċi. L-unika kwalifika li talbet hija purament il-gost li timla imnifsejk bit-tagħlim. 

Din l-esperjenza teżisti għal dawk l-anzjani li daħlu fil-fażi tal-irtirar imma qed ifittxu li jużaw l-anzjanità tagħhom mhux bħala xitwa qalila imma bħala kapitlu ġdid li għalkemm fih l-isfidi huwa wkoll imlewwen. Jien inxebbah l-anzjanità mar-rebbiegħa; staġun li jġib ħafna tama wara xitwa li taqtagħlek nifsek. 

Din is-sena l-Unjoni Ewropea tefgħet sfida importanti għall-imsieħba tagħha. Qed tiddedika s-sena għall-anzjanità attiva u s-solidarjetà bejn il-ġenerazzjonijiet.  Bla dubju, din l-università hija msejsa sew fuq dawn il-prinċipji għax lill-anzjani qed tagħtihom diversi ħiliet biex jibqgħu attivi.

Malta hi xxurtjata li l-anzjani tagħha nbiddlu u qegħdin f’fażi ta’ transizzjoni mill-isbaħ. L-anzjani llum huma parti mid-dinja. Jafu x’qed jiġri fil-Palestina u fl-Iżrael u jafu x’deċiżjonijiet qed jieħdu l-mexxejja Ewropej meta jiltaqgħu fl-ogħla istituzzjonijiet tal-Unjoni Ewropea. L-anzjani jħaddmu t-teknoloġija bla biża’ bħaż-żgħażagħ. 

Dan kollu jfisser li l-anzjan sab iċ-ċavetta t-tajba: l-adattament.  Mhux imma addattament ta’ bilfors għax ma kellux triq jew alternattiva oħra.  Imma adattament biex jirbaħ hu.  Biex permezz tal-mezzi ġodda jkollu iktar kapitli ta’ esperjenzi sbieħ wara dahru. L-anzjani tagħna għalhekk juruna ċar u tond xi tfisser tkun reżiljenti.  

Jalla iktar anzjani jkollhom il-ħin li jissieħbu f’din l-esperjenza sabiħa tal-Università tat-Tielet Età. Minnha għandu ħafna xi jgawdi.