Joseph Muscat jippika mill-Oppozizzjoni

Illum nistgħu niftaħru li l-Maltin qed jgħixu iktar minn qatt qabel. Dan grazzi għas-servizzi konsistenti li qed noffru jum wara jum.

Għoxrin sena ilu, l-età medja li jgħixu l-irġiel kienet ftit aktar minn 73 sena. Illum l-età medja hi 79 sena. In-nisa 20 sena ilu kellhom life expectancy ta’ 78 sena. Illum jgħixu 83 sena. Dan ma ġarax b’kumbinazzjoni. Hu riżultat tal-investiment li għamilna fil-qasam tas-saħħa.  

Irridu nkomplu ntejbu s-servizzi ta’ rijabilitazzjoni. Rijabilitazzjoni tfisser li inti ma jkollokx bżonn toqgħod l-Isptar Mater Dei. Imma jkollok bżonn tidħol fi sptar tar-rijabilitazzjoni. Dan hu sptar apposta li jgħinnek tirkupra wara marda akuta.  

Il-Gvern iddeċieda li jikri l-isptar St. Philips. Dan l-isptar diġà hu mibni u li jista’ jibda jintuża mill-ewwel għas-servizzi tar-rijabilitazzjoni għal nies ta’ kull età. Il-Gvern innegozja prezz tajjeb kemm għall-kiri kif ukoll jekk għada pitgħada jrid jixtri l-isptar.

Imma l-Oppożizzjoni qed tipprova tħammeġ u tkisser dan il-proġett. Tant m’għandhomx ideat li Joe Muscat u sħabu li qalilna li missna krejna hotel. U nbiddluh fi sptar!

Kien hemm tliet għażliet li l-Gvern kellu quddiemu biex isir Ċentru ta’ Rijabilitazzjoni. Seta’ jibni Ċentru ta’ Rijabilitazzjoni ġdid f’San Vinċenz de Paul; jew jidħol għal refurbishment tal-Isptar San Luqa; jew jikri sptar mill-privat.

Biex jinbena Ċentru Gdid f’San Vinċenz de Paul għal 280 persuna, l-ispiża kienet se tkun €53 miljun.  Biex jiġi rranġat l-Isptar San Luqa għal 280 persuna, l-ispiża kienet se tlaħħaq €40 miljun. Il-prezz negozjat għax-xiri ta’ St Philip’s li se jkun fih spazju għal 110 persuni hu għal €12.4 miljun.

Il-prezz li nnegozja l-Gvern hu €9 miljun anqas mit-talba li għamlu s-sidien l-isptar. B’St. Philips, il-kirja se tiġi €20 kuljum għal kull sodda.

Joe Muscat imma jrid jippika. Bil-pika ta’ Joe Muscat imorru minn taħt dawk li għandhom bżonn il-kura. Muscat hekk jaħdem. Iħassar. Ikisser. Politika antika tal-le biss. Ma joffri xejn.   

Joe Muscat qed jagħmel dan kollu meta għadu fl-Oppożizzjoni! Aħseb u ara la jkun fil-gvern. Joe Muscat hu perikoluż fl-Oppożizzjoni aħseb u ara jekk għada pitgħada jkun fil-gvern.