Il-Partit Nazzjonalista biss jista' jaghtik il-vera Futur

Li tixjieħ jagħmlek iktar għaref. Jgħinnek biex tiżen aħjar. L-anzjani tagħna llum għandhom biżżejjed esperjenza biex jagħrblu Malta taħt Gvernijiet Laburisti u f’idejn Gvernijiet Nazzjonalisti.

Kapaċi jiġbdu konklużjoni dwar x’jaqbel u x’ma jaqbilx għall-futur ta’ Malta u ta’ uliedhom.

L-anzjani raw lil Malta tinbidel. Raw l-iżvilupp fl-oqsma tat-teknoloġija, l-infrastruttura, is-saħħa, l-edukazzjoni u x-xogħol. Raw l-impjiegi jsalvaw waqt li pajjiżi oħra qed jittieklu mill-qgħad.

Dan kollu ġie bl-enerġija tal-Partit Nazzjonalista li dejjem emmen fil-futur.

L-anzjani tagħna jafu li l-Maltin qed iħallsu anqas taxxi milli kienu jagħmlu qabel. Jafu li uliedhom u n-neputijiet tagħhom huma l-anqas li jħallsu taxxi fl-Unjoni Ewropea kollha. U jafu li dan kollu jfisser aktar flus fil-but. 

L-anzjani jafu li l-Gvern f’din il-leġislatura naqqas ukoll l-income tax għal diversi kategoriji ta’ nies fosthom l-ommijiet, il-ħaddiema u s-sidien ta’ negozji żgħar u medji u l-anzjani nfushom.  

L-anzjani tagħna jafu kemm uliedhom u n-neputijiet tagħhom għandhom opportunitajiet ta’ edukazzjoni u xogħol. 

L-anzjani tagħna jiftakru università taħt il-Labour b’numerus clausus u b’nofs tużżana korsijiet. Jiftakru s-sistema ta’ punti biex tidħol l-università.

Jiftakru l-istudenti tal-mediċina marbutin bil-ktajjen ta’ Kastilja wara li l-Gvern Laburista għalqilhom l-Iskola Medika. Fis-saħħa għadna kemm qlajna tifħir kbir mid-WHO.   

Jiftakru fis-snin disgħin l-istudenti fit-toroq għax tal-Labour flok l-istipendji riedu jdejnuhom.

L-anzjani tagħna jiftakru kif il-politika Laburista fil-qasam tax-xogħol kienet limitata għall-korpi tax-xogħol. Jiftakru r-riperkussjonijiet tal-bulk buying. It-tixħim biex stajt tixtri televixin. Il-kjuiet għall-prodotti bażiċi.

L-anzjani tagħna jafu kemm toroq għandhom mifruxa kemm uliedhom u n-neputijiet tagħhom u anki huma jekk jixtiequ biex jibqgħu jaħdmu jew jistudjaw.

Muscat bħalissa għaddej bi programm ċar fejn qed iwiegħed kollox lil kulħadd.  Anki jekk il-wegħdiet jikkontradixxu lil xulxin.

Muscat imma mhux qed jgħid x’jiswew lilek il-wegħdiet li qed jagħmel u kemm trid tħallas int minn butek biex tagħmel tajjeb għall-għatx għall-poter li għandu. 

Il-vera futur jista’ jagħtihulek biss il-Partit Nazzjonalista. L-istorja u l-fatti jitkellmu weħidhom.